Barangay Niugan, Nagkaisa sa Isinagawang Clean-Up Drive

Muling ipinamalas ng mga residente at opisyal ng Sangguniang Barangay ng Niugan ang diwa ng bayanihan sa isinagawang Clean-Up Drive ngayong Sabado, ika-7 ng Pebrero, 2026.

Ang aktibidad ay bahagi ng patuloy na programa ng barangay na layuning mapanatili ang kalinisan, kaayusan, at kalusugan ng bawat pamilyang Niugueño. Sa pangunguna ng mga miyembro ng Sangguniang Barangay, tinutukan ng paglilinis ang mga pangunahing daluyan ng tubig, mga gilid ng kalsada, at mga pampublikong lugar upang maiwasan ang pagbara ng basura at pagsugpo sa mga sakit gaya ng Dengue.

Ayon sa pamunuan ng barangay, ang kalinisan ng komunidad ay hindi lamang responsibilidad ng gobyerno kundi ng bawat mamamayan. Nagpasalamat ang Sangguniang Barangay sa lahat ng mga volunteers, tanod, at mga residenteng nakiisa sa paglilinis ng kanilang kani-kanilang tapat ng bahay at kapaligiran.

Ang proyektong ito ay inaasahang magpapatuloy bilang regular na aktibidad upang masigurong nananatiling "green and clean" ang Barangay Niugan para sa kaligtasan at kaginhawaan ng lahat.