Barangay Niugan, Matagumpay na Nakiisa sa Nationwide Simultaneous Earthquake Drill (NSED)

Bilang bahagi ng patuloy na paghahanda at pagpapataas ng kamalayan sa anumang uri ng sakuna, matagumpay na nakilahok ang buong pamunuan at mamamayan ng Barangay Niugan sa isinagawang Nationwide Simultaneous Earthquake Drill (NSED).

Ang pangunahing layunin ng aktibidad na ito ay mapalawak ang kaalaman, kasanayan, at kahandaan ng bawat miyembro ng komunidad sa tamang pagtugon sa oras na tumama ang isang malakas na lindol.

Sa hudyat ng sirena, sabay-sabay na isinagawa ng mga opisyal, kawani ng barangay, at mga residente ang wastong pagsasanay sa “Duck, Cover, and Hold”. Matapos nito, maayos ding ipinatupad ang mga pamamaraan sa ligtas na paglikas patungo sa mga itinalagang ligtas na open space o evacuation areas ng barangay. Nagkaroon din ng maikling pagbabalangkas sa tamang paunang-lunas (first aid) at pag-rescue kung sakaling magkaroon ng emergency.

Ayon sa Pamahalaang Barangay, ang pakikilahok sa NSED ay patunay na ang Barangay Niugan ay patuloy na nakikiisa sa mga pambansang programa na naglalayong mapanatili ang kaligtasan ng komunidad at zero-casualty laban sa mga sakuna at kalamidad.

Muling ipinaalala ng mga opisyal sa publiko na ang kahandaan ay hindi lamang ginagawa tuwing may drill, kundi isang araw-araw na disiplina na dapat taglayin ng bawat pamilya upang maging ligtas sa lahat ng oras.