Angat PNP, Nagsagawa ng Oplan Galugad at Custodial Facility Inspection

Bilang bahagi ng pagpapatupad ng Patrol Plan 2030, isinagawa ng Angat Municipal Police Station (MPS) sa ilalim ng Bulacan Police Provincial Office (PPO) ang isang masusing Custodial Facility Inspection at Oplan Galugad ngayong Hulyo 2, 2026.

Ang operasyon ay opisyal na pinagsimulan sa ganap na 8:30 ng umaga sa pangunguna ni Patrolman Ranjit B. Gelantaga-an, ang itinalagang Human Rights Affairs Office (HRAO) PNCO at Custodial Officer ng istasyon.

Pangunahing layunin ng inspeksyon at Oplan Galugad na suriin ang katatagan, kaligtasan, at pangkalahatang kondisyon ng mga lock-up cell o selda. Layon din nitong masigurong walang anumang kontrabando o ipinagbabawal na gamit ang nakapasok sa pasilidad upang maiwasan ang anumang hindi inaasahang insidente tulad ng pagtakas o kaguluhan sa loob.

Ayon sa pamunuan ng Angat PNP, ang regular na pagsasagawa ng ganitong aktibidad ay mahalaga upang mapanatili ang mataas na pamantayan ng seguridad, habang sinisiguro rin na nirerespeto ang karapatang pantao ng mga nasa ilalim ng kanilang kustodiya (Persons Deprived of Liberty o PDLs) alinsunod sa mga alituntunin ng Philippine National Police.