Angat MPS, Naglunsad ng 'Online Bisita' para sa mga PUPC

Alinsunod sa mga alituntunin ng PNP Patrol Plan 2030, naghatid ng makabagong serbisyong pangkalinga ang mga tauhan ng Angat Municipal Police Station para sa mga Persons Under Police Custody (PUPC) sa pamamagitan ng programang "ONLINE BISITA" ngayong Linggo, Hunyo 7, 2026, simula ganap na 11:00 ng tanghali patuloy.

Ang aktibidad ay pinangunahan ni Police Corporal (PCpl) Rham Anderson T. Reyes, na tumatayong HRAO/Custodial PNCO ng istasyon. Sa pamamagitan ng paggamit ng mga telepono, video call, at social media applications, nabigyan ng pagkakataon ang mga nakapiit sa Angat Custodial Facility na makausap, makita, at makumusta ang kanilang mga mahal sa buhay.

Ang "Online Bisita" ay binuo bilang isang alternatibo at ligtas na paraan ng pagbisita, lalo na para sa mga kamag-anak ng mga PUPC na malayo ang tirahan o walang kakayahang bumiyahe patungo sa istasyon ng pulisya.

Ayon sa pamunuan ng Angat MPS, sa ilalim ng pangangasiwa ng Bulacan PPO, ang programang ito ay hindi lamang naglalayong gamitin ang teknolohiya para sa mas maayos na pamamahala, kundi upang mapanatili rin ang mataas na moral at emosyonal na kalusugan ng mga nasa piitan sa pamamagitan ng patuloy na ugnayan sa kanilang pamilya, habang buong-pusong itinataguyod ang kanilang mga karapatang pantao.