'Angat Mobile Blood Donation,' Matagumpay na Isinagawa sa Taboc Super RHU

Sa patuloy na pagtugon sa pangangailangan ng sapat at ligtas na supply ng dugo para sa mga mamamayan, matagumpay na inilunsad ng Rural Health Unit (RHU) Angat ang "Angat Mobile Blood Donation" program.

Ang malawakang aktibidad na ito ng Mobile Blood Donation ay pormal na ginanap nitong ngayong ika-13 ng Mayo, 2026, sa makabagong pasilidad ng Taboc Super RHU na matatagpuan sa Barangay Taboc, Angat, Bulacan.

Dinagsa ng mga boluntaryong donor mula sa iba't ibang bahagi ng komunidad ang nasabing pasilidad upang makibahagi sa misyon. Bago sumalang sa mismong pagkuha ng dugo, ang bawat blood donor ay sumailalim muna sa masusing pagsusuri ng mga doktor at medical technologists upang matiyak na sila ay ligtas, malusog, at kuwalipikadong mag-donate.

Ayon sa pamunuan ng RHU Angat, ang bawat bag ng dugo na nalikom sa programang ito ay may kakayahang magsalba ng hanggang tatlong buhay. Malaki ang maitutulong nito para sa mga pasyenteng nangangailangan ng agarang transfusyon, tulad ng mga sumasailalim sa operasyon, mga biktima ng aksidente, at mga inang nanganganak.

Ipinahayag ng mga opisyal ng kalusugan ang kanilang malalim na pasasalamat sa lahat ng mga Angatenyong buong-pusong nag-alay ng kanilang oras at dugo para sa kapakanan ng kapwa. Pinasalamatan din ang mga katuwang na ahensya at ang mga kawani ng Taboc Super RHU na nagbigay ng kanilang serbisyo upang maging maayos, malinis, at ligtas ang buong proseso.