Pamilihang Bayan ng Angat, Nakiisa sa Pagpupulong ng mga Market Administrator sa Bulacan

Upang mas mapaganda ang serbisyo at operasyon ng lokal na palengke, lumahok ang pamunuan ng Pamilihang Bayan ng Angat sa ginanap na Bulacan Market Administrators Monthly Meeting  sa El Mercado Market, Calumpit, Bulacan.

Ang buwanang pagtitipon ay dinaluhan ng mga Market Administrators mula sa iba't ibang bayan at lungsod sa lalawigan. Layunin ng nasabing meeting na magkaroon ng pagpapalitan ng mga "best practices" sa pangangasiwa ng palengke, pagtalakay sa mga bagong ordinansa sa sanitasyon at seguridad, at pagsisiguro na ang mga pampublikong pamilihan ay nananatiling maayos at sentro ng lokal na ekonomiya.

Ayon sa pamunuan ng Pamilihang Bayan ng Angat, ang pakikilahok na ito ay bahagi ng direktiba ni Mayor Jowar Bautista na gawing prayoridad ang paglago at pag-unlad ng merkado. Sa pamamagitan ng pakikipag-ugnayan sa ibang bayan, mas mapapabuti ang sistema ng koleksyon, kaayusan ng mga pwesto, at proteksyon para sa mga mamimili at manininda sa Angat.