Angat MDRRMO at BPLO, Matagumpay na Nagdaos ng Standard First Aid Training para sa Business Sector

Matagumpay na nakapagtapos ang 26 na kalahok sa masinsinang Standard First Aid Training (SFAT) na idinaos noong nakaraang Mayo 12-15, 2026. Ang programa ay binuo para sa mga empleyado ng iba't ibang establisyimento at ilang kawani ng Lokal na Pamahalaang Bayan ng Angat upang pataasin ang antas ng kahandaan sa mga emergency.

Ang apat na araw na pagsasanay ay isinakatuparan sa pangunguna ng Angat Municipal Disaster Risk Reduction and Management Office (MDRRMO), sa ilalim ng pamumuno ni G. Carlo R. Rivera Jr., MGDH I, at sa masugid na pakikipag-ugnayan kay G. Yral Calderon ng Business Permit and Licensing Office (BPLO Angat).

Binigyang-diin ng Angat MDRRMO na napakahalagang bigyan ng kasanayan ang mga sektor na araw-araw humaharap sa mga kliyente at publiko. Ang pagkakaroon ng kaalaman sa pagbibigay ng paunang lunas sa loob ng mga lugar-paggawa ay kritikal upang matiyak ang kaligtasan ng mga mamimili at manggagawa.

Kasama rin sa sumailalim sa pagsasanay ang mga miyembro ng Angat Rescue Team na kumuha ng refresher course upang mas lalong mapatalas ang kanilang kakayahan sa pagtugon sa mga sakuna.

Pinangasiwaan ng mga ekspertong tagapagsanay mula sa Philippine Red Cross (PRC) - Bulacan Chapter ang buong kurso. Sa loob ng apat na araw, sumailalim ang mga kalahok sa mga teoretikal na talakayan at mga aktwal na pagsasanay ukol sa:

• Basic First Aid (Paunang Lunas)

• Cardiopulmonary Resuscitation (CPR) gamit ang Automated External Defibrillator (AED)

• Bandaging and Splinting Techniques (Pagtatali at Pag-splint sa Bali)

• Immobilization, Lifting, and Moving Techniques (Ligtas na Pagbubuhat at Paglipat ng Pasyente)

Upang masisid ang aktwal na kahusayan, sumalang ang mga kalahok sa mga return demonstration at sa huling araw ay sumabak sa isang matinding Simulation Exercise kung saan sinubok ang kanilang bilis, dunong, at tatag sa ilalim ng mga pekeng senaryo ng aksidente.

Sa pagtatapos ng programa, opisyal na ginawaran ng sertipikasyon ang 26 na kalahok na ngayo'y ganap nang sertipikadong mga First Aiders.

Ayon pa sa pamunuan ng MDRRMO, ang aktibidad na ito ay bahagi lamang ng mas malalaki pang programa sa ilalim ng pamumuno ni Hon. Reynante "Jowar" S. Bautista, Punong Bayan at MDRRMC Chairperson. Patuloy na maglulunsad ang lokal na pamahalaan ng mga katulad na pagsasanay na nakasentro sa pagbuo ng isang resilient, handa, at ligtas na Bayan ng Angat.