Street Dance ng Gulayangat Champions at Prusisyon, Tampok Ngayong Enero 24

Inaasahang magiging makulay at puno ng sigla ang darating na ika-24 ng Enero, 2026 sa Barangay Niugan para sa kapistahan ng patron na si San Pablo Apostol. Tampok sa pagdiriwang ang pagtatanghal ng mga kabataan ng parokya na kinilalang kampeon sa nakaraang Gulayangat Festival.

Magsisimula ang selebrasyon sa ganap na ika-6:00 ng umaga sa pamamagitan ng isang street dancing kung saan ipamamalas ng mga kabataang Niuganeño ang kanilang husay at talento sa lansangan. Sa gabi naman, ganap na ika-6:00, gaganapin ang solemne na prusisyon ng mahal na patron.

Dahil sa mga aktibidad na ito, naglabas ng Traffic Advisory ang Sangguniang Barangay ng Niugan. Inaasahan ang matinding pagsisikip ng daloy ng trapiko sa kahabaan ng main highway at mga kalsada ng barangay. Pinapayuhan ang mga motorista na gumamit ng mga alternatibong ruta at agahan ang kanilang biyahe upang hindi maabala. Nanawagan ang pamunuan ng pakikiisa at disiplina mula sa publiko upang masiguro ang tagumpay at kaayusan ng pista.