Pagpapalakas ng Serbisyong Medikal, Tinalakay sa Local Health Board Meeting sa Bagong Munisipyo ng Angat

Upang masiguro ang tuloy-tuloy at de-kalidad na serbisyong pangkalusugan para sa mga Angateño, matagumpay na idinaos ang Local Health Board (LHB) Meeting nitong ika-29 ng Enero, 2026.

Ginanap ang pagpupulong sa Conference Room ng New Municipal Building sa Barangay San Roque, sa pangunguna ng Angat Rural Health Unit (RHU) at ng pamunuan ng lokal na pamahalaan. Layunin ng pagtitipon na repasuhin ang mga kasalukuyang programa sa kalusugan, talakayin ang mga hamon sa sektor ng medisina, at maglatag ng mga bagong estratehiya para sa taong 2026.

Kabilang sa mga binigyang-diin sa pulong ang pagpapalawak ng mga serbisyo sa mga Barangay Health Centers, pagpapaigting ng mga immunization programs, at ang pagpapanatili ng sapat na suplay ng gamot para sa mga mamamayan. Ang Local Health Board ay nagsisilbing mahalagang mekanismo upang masiguro na ang bawat pisong inilalaan para sa kalusugan ay nagagamit nang wasto at direktang nararamdaman ng bawat pamilyang Angateño sa ilalim ng administrasyong Bautista.