Barangay Banaban, Matagumpay na Naisagawa ang Lingguhang ‘Clean-up Drive’

Sa layuning mapanatili ang kaayusan at kaligtasan ng komunidad, muling nagkaisa ang mga opisyales at residente ng Barangay Banaban para sa kanilang Weekly Clean-up Drive ngayong Sabado, ika-21 ng Marso, 2026.

Ang nasabing aktibidad ay bahagi ng tuloy-tuloy na programa ng barangay sa ilalim ng pamumuno ni Punong Barangay Igg. Fernando P. Dela Torre. Nakatuon ang operasyon sa paglilinis ng mga baradong kanal at pag-aalis ng mga stagnant water o nakaimbak na tubig upang maiwasan ang pagdami ng mga lamok na may dalang sakit, lalo na ngayong nararamdaman na ang init ng panahon.

Ipinamalas ng mga boluntaryo ang diwa ng bayanihan sa pamamagitan ng pagwawalis sa mga pangunahing kalsada at paglilinis sa mga pampublikong pasilidad ng barangay. Ayon sa lokal na pamahalaan, ang ganitong mga hakbang ay hindi lamang para sa estetika ng kapaligiran, kundi isang proaktibong paraan upang masiguro ang kalusugan ng bawat pamilyang Angateño.